مشكلة كبيرة انك تكون بتحسب حساب كل كبيرة وصغيرة فى حياتك!!..خصوصا فى اختيار شريكة الحياة.ومشكلة اكبر فى مجتمعنا المصرى اللى بيحرم الاختلاط العلنى المحترم وبسمح بطريقة او بأخرى بباقى انواع الاختلاط بين الرجل والمرأة!!..طيب تعمل ايه لو مافيش فرصة انك تقابل شريكة حياتك؟!!..هتعملى ايه لو انتى محبوسة فى البيت وخلصتى الكلية ومش بتشتغلى ؟!!..ولو بتشتغلوا ومافيش فى الشغل تعامل مع الجنس الاخر ؟!!..وبرضوا عايز اتجوز عن حب ؟!!..عايز تسلسل منطقى للعلاقة..( لا شيئ..تعارف - تفاهم - صداقة - حب - جواز.)..ليه دايما مضطرين نبدأ بالعكس ..نبدأ بالجواز وننتهى بلا شيئ؟!!..طيب هل لو اضطريت لجواز صالونات هتعمل ايه؟!!..فى ناس بتقول الام بتختار صح لانها امرأة وعارفة تفرق بين البنت دى ودى ..وفى ناس بتقول لأ ياعم الام هتختار اللى على مزاجها مش اللى على مزاج ابنها!!..والبنت ساعات تقول طيب اعمل ايه؟!!..ماهوا بابا سأل عليه وخايفة القطر يفوتنى واهو ضل راجل !!..لا دا كمان بعض البنات بيوصل بيهم اليأس لدرجة انهم يقولوا لقب مطلقة احسن من لقب عانس!!..والراجل افكاره هوا كمان عجيبة ..من اول انه يختار الجمال علشان مايبصش برة !!..وواحد خام تبلفه البنت برقتها حتى لو كانت مصطنعة وتوقعوا وبعد كده تتحكم فيه!!..وواحد عامل برم قال ايه حاطط مواصفات تعجيزية فى الشكل والطول والجسم والتعليم علشان يضمن ان يقدر يحبها او على الاقل مايكرهاش مع الوقت!!..وفيه طبعا اللى مقطع السمكة وديلها قبل الجواز واللى بالنسباله الجواز راحة واستقرار وطبعا نهاية للحياة !!..هل فعلا فيه عروسة على المقاس؟!!..هل فعلا فى "ماتشنج" ؟!!..هل الطيور على اشكالها تقع؟!!..طيب وايه رد فعلك لو شربت المقلب وبعد الجواز طلعت انك اشتريت الترماى؟!!..هتطلق ولا هتستحمل علشان العيال؟!!..ولومافيش العيال هل هتوفر تمن الجوازة التانية؟!!..ولا انتا اصلا لا قادر ولافاجر علشان تتجوز تانى؟!!..طيب والمرأة ماهى مش هتقدر تتجوز تانى ..هل تعصر على نفسها لمونة كل يوم؟!!..ولا تدخل الفيس بوك وتعيش مع عالم خيالى؟!!..انا مؤمن ان المرأة شديدة الاخلاص فى الحب ..وفى الخيانة ايضا!!..الراجل ممكن يتصرف كحيوان شهوانى ..بس المرأة أكيد لازم تملك قلبها علشان تستمتع بجسمها ..يعنى ايه؟!!..هتخون ولا لأ؟!!..طيب والجوازات الناجحة نجحت..نجحت ليه؟!!..وهل المبدأ المصرى العظيم بتاع مشى حالك يتحقق فى الجواز؟!!..هل للصبر حدود؟!!..الأسئلة كتير بس فيه سؤال أخير ..هوا انتا اصلا هتتجوز ليه ؟!!..
عاوز عروسه ع المقاس عينها خضرا بشعر اصفر
ردحذف